ဗွီဒီယိုသတင်းထောက်များ လွတ်မြောက်ရေး ဆောင်ရွက်ပေးနေ

မြန်မာနိုင်ငံမှာ ထောင်ဒဏ်ကျခံနေရတဲ့ ဒီမိုကရက်တစ် မြန်မာ့အသံ (DVB) ရုပ်သံ သတင်းထောက် ကိုငွေစိုးလင်းရဲ့ မွေးနေ့ပွဲမှာ မြန်မာပြည်က ဗွီဒီယို သတင်းထောက်တွေ လွှတ်မြောက်ဖို့အတွက် လှုပ်ရှားမှုတခုကို ထိုင်းနိုင်ငံ ချင်းမိုင်မြို့မှာ ဒီကနေ့ ည ကျင်းပမှာ ဖြစ်ပါတယ်။

“ဒီကနေ့ တိုက်ဆိုင်တာက သူရဲ့ အနှစ် (၃၀) ပြည့်မွေးနေ့ ဖြစ်ပါတယ်။ အပြင်မှာ ကျန်ခဲ့တဲ့ လုပ်ဖော်ကိုင်ဖက်တွေ၊ ရဲဘော်ရဲဘက်တွေအနေနဲ့၊ သူထောင်မကျခင်မှာ ရိုက်ခဲ့တဲ့ ရုပ်ရှင်လေးကို ပြပြီး၊ သူ့ကိုလည်း အမှတ်တရရှိအောင်၊ သူလိုပဲ တခြားထောင်ကျနေတဲ့ ဗွီဒီယိုသတင်းထောက်တွေရဲ့ အကြောင်းကို တခြားသူတွေလည်း ကျယ်ကျယ်ပြန့်ပြန့် ပိုသိရအောင် ဒီအစီစဉ်ကို လုပ်ရခြင်းဖြစ်ပါတယ်လို့” (DVB) ထိုင်းဌာန တာဝန်ခံ ဦးတိုးဇော်လတ်က ပြောပါတယ်။

ဒီလှုပ်ရှားမှုကို အကျဉ်းကျခံ မြန်မာ ဗွီဒီယို သတင်းထောက်တွေ လွတ်မြောက်ရေး လှုပ်ရှားတဲ့ Free Burma VJ အဖွဲ့နဲ့ ပြင်သစ်နိုင်ငံ ပါရီမြို့ အခြေစိုက် နယ်စည်မခြား သတင်းထောက်များ အဖွဲ့ (RSF) တို့က ပူးပေါင်း ကျင်းပမှာ ဖြစ်ပါတယ်။


သူ ရိုက်ခဲ့တဲ့ နာဂစ်မုန်တိုင်းအပြီး မိဘမဲ့ ကလေးငယ်တွေရဲ့အကြောင်း (Orphans of Burma’s Cyclone) မှတ်တမ်း ဗီဒီယိုကို လန်ဒန်အခြေစိုက် Rory Peck Trust ဆု ချီးမြှင့်ခြင်းခံရတာ ဖြစ်ပါတယ်။

၂၀၀၉ခုနှစ် ဇွန်လ ၂၆ ရက်နေ့က တာမွေမြို့နယ် ကျောက်မြောင်းရှိ အင်တာနက် ကဖေးဆိုင် တစ်ဆိုင်မှာ သူရဲ့ သူငယ်ချင်းတစ်ယောက်နဲ့အတူ ဖမ်းဆီးခံတာ ဖြစ်ပြီး အီလက်ထရောနစ် အက်ဥပေဒ ထောင်ချခံရတာ ဖြစ်ပါတယ်။ သူနဲ့အတူ စုစုပေါင်း ဗွီဒီယို သတင်းသမား (၁၇) ဦး အဖမ်းခံရတယ်လို့ သိရပါတယ်။

အခုလို မြန်မာပြည်မကဘဲ ကမ္ဘာက သိရှိလာအောင် ရုပ်သံမှတ်တမ်းရိုက် ယူတဲ့အခါမှာ လုံခြံရေးကို စိုးရိမ်ရပေမယ့် သတင်းသမားတွေက ပြည်သူတွေအတွက် စိတ်ဓါတ်နဲ့ အလုပ်လုပ်နေတာ ဖြစ်တဲ့အကြောင်း သူရဲ့ လုပ်ဖော်ကိုင်ဖက် တဦးဖြစ်တဲ့ ကိုအောင်ထွန်းက ပြေပါတယ်။

“ဒီပြင်ပ မီဒီယာနဲ့ ဆက်သွယ်ပြီး လုပ်တဲ့ သူအားလုံးဟာ တချိန်မှာ အဆုံးသတ်သွားနိုင်တာ၊ ရလာမယ့် ဆုလဒ်ကတော့ အစိုးရက ထောင်ဒဏ် အပစ်ပေးခံရမှာတွေ လူတိုင်းက သိပြီးသားပဲ။ ကိုယ်လုပ်နေတဲ့ ကာလမှာပဲ အလုပ်ကို အာရုံစိုက်ပြီးတော့ အကောင်းဆုံး ပြည်သူတွေ ခံစားနေရတဲ့ မပြောနိုင်၊ မကြားနိုင်တဲ့ အသံတွေ၊ အရုပ်တွေကို သူတို့ကိုယ်စား၊ မြန်မာပြည်သူ အချင်းချင်းပဲဖြစ်ဖြစ်၊ ကမ္ဘာက သိအောင် ဘယ်လို ပေးပို့နိုင်မလဲဆိုတဲ့ စိတ်နဲ့ပဲ သူတို့ လုပ်နေကြတာ။”

မြန်မာနိုင်ငံမှာ ကိုငွေစိုးလင်း အပါအ၀င် သတင်းသမား ၂၆ ဦးနဲ့ နိုင်ငံရေး အကျဉ်းသား ၂၀၆၁ ဦးကို အစိုးရက ဖမ်းဆီးထားတယ်လို့ နိုင်ငံရေးအကျဉ်းသားများ ကူညီ စောင့်ရှောက်ရေး အသင်း (AAPP) က ထုတ်ပြန်ထားပါတယ်။

မေလ (၂၄) ရက်နေ့က မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးဆိုင်ရာ အထူးကိုယ်စားလှယ် မစ္စတာ ကင်တာနားကို သတင်းနဲ့ပါတ်သက်ပြီး ဆက်နွယ်နေတဲ့ နိုင်ငံရေးအကျဉ်းသားအကြောင်းတွေကို ပိုမို ကိုင်တွယ်ဖို့အတွက် Free Burma VJ အဖွဲ့က တင်ပြခဲ့တယ်လို့ သိရပါတယ်။

ယုန်ကလေး