အင်းစိန်ထောင်တွင်း ပစ်ခတ်မှုကြောင့် အကျဉ်းသား ၃၀ ကျော် သေဆုံး
05 May 2008
ရန်ကုန်မှာတော့ အင်းစိန်ထောင် မီးလောင်တယ်လို့ သတင်းထွက်နေပေမယ့် တကယ်တမ်းက မီးအကြီး အကျယ်လောင်တဲ့သဘောတော့ မဟုတ်ဘဲထောင် ဆူသလိုဖြစ် ပြီး ထောင်အာဏာပိုင်တွေက အကျဉ်းသား တွေကို ပစ်ခတ်နှိမ်နင်းခဲ့တာလို့ သိရပါတယ်။ အဖြစ်အပျက်အသေးစိတ်အတွက် မြန်မာနိုင်ငံထဲကို ဖုံးလိုင်းတွေ အခက်အခဲဖြစ် နေတော့ အာဏာပိုင်တွေကိုဖြစ်စေ၊ အင်းစိန်ထောင်အနီးတ၀ိုက်ကိုဖြစ်စေ ဖုံးခေါ်လို့ မရပါဘူး။ အေအေပီပီခေါ် နိုင်ငံရေးအကျဉ်းသားများ ကူညီစောင့်ရှောက် ရေးအသင်း အတွင်းရေးမှူး ကိုတိတ်နိုင်ကတော့ သူတို့ရရှိထားတဲ့သတင်းကို အခုလိုပြော ပါတယ်။
“စနေနေ့မနက်ပိုင်း အစောကြီးမှာ အင်းစိန်ထောင်မှာ လေတိုက်တယ်၊ မိုးတွေရွာတယ်။ အဲဒီအတွက် မနက် အစောကြီးမှာ အင်းစိန်ထောင် အကျဉ်းသားအချုပ်မှာ မနက်အစောကြီးမှာ မီးလှုံတယ်လို့ ကျနော်တို့ကြား ရတယ်။ အဲလိုမီးလှုံရာကနေ လေတိုက်တဲ့အတွက် မီးလောင်မှုဖြစ်တယ်။ မီးလောင်မှုဖြစ်တာကို ၀န်ထမ်းတွေက
မီးငြှိမ်းမပေးဘဲနဲ့ မိန်းဂျေးပေါ်ကနေ သေနတ်တွေနဲ့ ၀ိုင်းပစ်တယ်လို့ သိရတယ်။ အဲဒါကြောင့် ၃၆ ဦးသေဆုံး တယ်လို့ သိရပါတယ်။”
သေဆုံးတဲ့ ၃၆ ဦးဆိုတာ ရိုးရိုးသာမန်အကျဉ်းသားတွေလား၊ ဘယ်လိုလူတွေများပါလဲ။
“အဲဒါကတော့ တိတိကျကျ မသိရသေးပါဘူး။ အများအားဖြင့်တော့ သာမန်အကျဉ်းသားတွေ ဖြစ်ဖို့များပါတယ်။ ဘာဖြစ်လို့လဲဆိုတော့ အဲဒီအချိန်မှာ သာမန်အကျဉ်းသားတွေပဲ အပြင်ထွက်ခွင့်ရှိတဲ့ အချိန်ဖြစ်နေလို့ပါ။”
နိုင်ငံရေးအကျဉ်းသားတွေရဲ့ အခြေအနေ၊ တိုက်ထဲမှာရှိတဲ့လူတွေရဲ့ အခြေအနေတွေရော ဘာများကြားပါ သလဲ။
“အဓိက နောက်ဆုံးသတင်းကတော့ ထောင်ဝင်စာတွေ ပေးလို့မရဘူး။ ထောင်ထဲမှာ ၀မ်းကိုက်ရောဂါ တွေဖြစ် တယ်၊ ၀မ်းတွေသွားတယ်ဆိုပြီး မိသားစုတွေက လာပေးတဲ့ အိမ်က ချက်ဟင်းတွေ၊ အစိုဟင်းတွေကို ပေးလို့ မရဘူး။ ငါးပိကြော် ပေးလို့မရဘူး။ ထောင်ထဲမှာ ၀မ်းရောဂါဖြစ်တယ်ဆိုတဲ့ အကြောင်းပြချက်နဲ့ တားမြစ်ထား တယ်။ အဲဒီနေ့ကစပြီး တယ်လီဖုန်းလိုင်းတွေရော ဖြတ်တောက်ထားတဲ့အတွက် မြန်မာပြည်ထဲမှာတောင် တနေရာနဲ့တနေရာ ဆက်သွယ်လို့မရဘူး ဖြစ်နေပါတယ်။”
မီးလောင်တယ်ဆိုတာ ဘယ်လိုလောင်တာပါလဲ၊ ထောင်ကိုမီးလောင်သွားတာလား။
“ကျနော်တို့ကြားတာတော့ အကြီးအကျယ်ကြီးလောင်တာတော့ မဟုတ်ပါဘူး။ မီးလှုံရာကနေ လေအရမ်း တိုက်တဲ့အတွက် မီးကူးတာပေါ့။ ရုတ်ရုတ် ရုတ်ရုတ်ဖြစ်တဲ့အခါ ၀န်ထမ်းတွေကလာတယ်၊ လာတဲ့အခါ အကျဉ်းသားတွေက ထွက်ပြေး။ နောက်ဆုံး ထွက်ပြေးလို့ မိန်းဂျေးပေါ်ကနေ ပစ်တာခတ်တာတွေဖြစ်တယ်လို့ ကျနော်တို့ကြားရပါတယ်။”
အထိအခိုက် ဒဏ်ရာရတာရော ဘယ်လောက်ကြားပါလဲ။
“အဲဒါတော့ အတိအကျ မသိသေးပါဘူး။”
နောက်ဆုံးအခြေအနေက အင်းစိန်ထောင်ကို သွားတွေ့လို့ရလား၊ ပစ္စည်းတွေ ဘာတွေရော ပေးလို့ရလား၊ ဘာများကြားပါသလဲ။
“စနေနေ့က တချို့ နိုင်ငံရေးအကျဉ်းသားမိသားစုတွေ ထောင်ဝင်စာသွားတွေ့ကြတယ်။ အဲဒါကြောင့် ဖြစ်တဲ့ နေ့မှာပဲ သိလိုက်တယ်။ ဒါပေမယ့် ဘယ်မှ သွားလို့လာလို့မရဘူး ဖြစ်နေတဲ့အတွက် သူတို့ လည်း ဘယ်လိုမှ သတင်းပေးလို့မရဘူးဖြစ်တယ်။”
နောက်ဆုံးအခြေအနေရော ဘာများကြားပါသလဲ။
“ကျနော်တို့သိရသလောက်တော့ တချို့နိုင်ငံရေးအကျဉ်းသားမိသားစုတွေကအန်န်အယ်လ်ဒီရုံးချုပ်သွားပြီးတော့ အဖြစ်အပျက်နဲ့ပတ်သက်ပြီး အစီရင်ခံနေတယ်လို့ကြားပါတယ်။”
ရန်ကုန် အင်းစိန်ထောင်မှာ ထောင်ဆူတာဆိုလို့ နောက်ဆုံး ၁၉၈၈ ခုနှစ် အရေးအခင်းကာလလို့ ဆိုရမှာပါ။ အဲဒီတုန်းကလည်း ထောင်မီးလောင်ပြီး ထောင်အာဏာပိုင်တွေက ပစ်ခတ်နှိမ်နင်းတာကြောင့် အကျဉ်းသား ရာနဲ့ချီပြီး သေဆုံးခဲ့တယ်လို့ သိရပါတယ်။
နောက်ဆက်တွဲအခြေအနေနဲ့ပတ်သက်ပြီး အေအေပီပီအတွင်းရေးမှူး ကိုတိတ်နိုင်က ဗွီအိုအေကို အခုလို ဆက်ပြောပါတယ်။
“သောကြာနေ့ တညလုံးမှာ မိုးတွေရွှဲနေတယ်၊ မုန်တိုင်းတွေတိုက်နေတဲ့အတွက် မနက်ကျတော့ တံခါးလာဖွင့် မပေးဘူးလို့ ပြောတယ်။ အဲဒီကနေ ပြဿနာစတက်တယ်။ အခု ၉၈ ယောက်ကို လောလောဆယ် တိုက်ပိတ် ထားတယ်။ ၄ ဦးက ဆူပူမှုကို ဖန်တီးတယ်ဆိုပြီး စစ်ကြောရင်းနဲ့ လက်လွန်ပြီး သေဆုံးသွားတယ်လို့ ထပ်သိရ တယ်။ ပွဲချင်းပြီးသေတာကတော့ ၃၆ ယောက်ဖြစ်တယ်။ ၇၀ ကျော်က ဒဏ်ရာရတယ်။ ရမ်ဘိုဗွီဒီယိုခွေ ကိစ္စနဲ့ ပတ်သက်ပြီး ဖမ်းဆီးခံထားရတဲ့ လှိုင်မြို့နယ်က ကိုထွန်း၊ ကိုသန်းဇော်၊ ဒေါပုံမြို့နယ်က ကိုအုန်းကျော်၊ ကိုဉာဏ်လင်းအောင်၊ သူတို့ ၄ ယောက်က နိုင်ငံရေးအကျဉ်းသားတွေဖြစ်တယ်။ အဲဒီ ၄ ယောက်ကိုလည်း တိုက်ပိတ်တဲ့အထဲမှာပါတယ်လို့ သိရတယ်။”
နိုင်ငံရေးအကျဉ်းသားတွေ သူတို့မိသားစုတွေနဲ့ တိုက်ရိုက် ထောင်ဝင်စာတွေ့ခွင့်ရတယ်လို့ ကြားပါသလား။
“တချို့ တွေ့လို့ရပါတယ်။ တော်တော်များများကိုတော့ ထောင်ဝင်စာပိတ်ထားပါတယ်။ တစ်ဆောင်ကလူ တော်တော်များများကိုတော့ ထောင်ဝင်စာပိတ်ထားတယ်။ အခုဖြစ်တာက အဓိက အမှတ်တစ်ဆောင်က ဖြစ် တာပါ။”
0 comments:
Post a Comment