ကွယ်လွန်သူ ကရင်အမျိုးသား အစည်းအရုံး (KNU) အထွေထွေအတွင်းရေးမှူးချုပ် ဟောင်း ပဒိုမန်းရှာလားဖန်းရဲ့ တတိယအကြိမ်မြောက် လူငယ်ခေါင်းဆောင်ဆုကို နော်ဒီဇင်ဘာဖောက ရရှိသွားတယ်လို့ သိရပါတယ်။
ဒီဆုကို ကရင်မျိုးဆက်သစ်လူငယ်တွေထဲက ဒေသတွင်းခေါင်းဆောင်ပြုနိုင်သူ၊ ဆင်းရဲမှု ပပျောက်ရေးအတွက် ဆောင်ရွက်နိုင်သူ၊ ပညာရေး မြှင့်တင်ပေးနိုင်သူ၊ ဖွံ့ဖြိုးရေးအစီအစဉ်ကို မြှင့်တင်ပေးနိုင်သူနဲ့ ကရင်ယဉ်ကျေးမှုကို ထိန်းသိမ်း ဆောင်ရွက်နိုင်သူကို ချီးမြှင့်တာ ဖြစ်တယ်လို့ နန့်ဇိုယာဖန်းက ပြောပါတယ်။
“ အဓိက ရည်ရွယ်ချက်ကတော့ ကျမတို့က ဒီထူးခွန်တဲ့ လူငယ်တွေရဲ လုပ်ဆောင်ချက်တွေကို အခြားလူငယ်တွေအတွက် စံနမူနာကောင်းတဲ့ လူငယ်တယောက်အနေနဲ့ ကျမတို့က ဂုဏ်ပြုတာလည်း ဖြစ်ပါတယ်။ပြီးတော့ ကျမအဖေ ပဒိုမန်းရှာလားဖန်းနဲ့ ကျမအမေ နန်းကြည်ရွှေ နှစ်ပါးလုံးရဲ့သူတို့ ဖြစ်ချင်တဲ့ ဆန္ဒကို ဖြစ်မြောက်အောင် ကျမတို့ သားသမီးတွေက ဆုကို ပေးတဲ့ အနေနဲ့ ကျမတို့ မိဘနှစ်ပါးစလုံးကို ဂုဏ်ပြုတာ ဖြစ်ပါတယ်”
နော်ဒီဇင်ဘာဖေါကို ထားဝယ်ဒေသက ရွာတရွာမှာ မွေးဖွားခဲ့ပြီး သူ့မရဲ့အိမ်နဲ့ရွာကိုတော့ မြန်မာ အစိုးရတပ်က ဖျက်ဆီးခဲ့တဲ့အတွက် ထိုင်းနယ်စပ်က ဒုက္ခသည်စခန်းမှာ လာရောက် ခိုလှုံခဲ့တာ ဖြစ်ပါတယ်။
ဒုက္ခသည်စခန်းတွင်းမှာ ၁၀ တန်း အောင်မြင်ပြီးနောက် နယ်စပ်မှာရှိတဲ့ ဒေါက်တာစင်သီယာမောင်ဆေးခန်းမှာ ဆေးပညာလေ့လာ သင်ယူပြီး ထားဝယ်ခရိုင်မှာ လူထုကို ဆေးကုသပေးနေသူ ဖြစ်ပါတယ်။
တဆက်ထဲမှာ သူမဟာ ကရင်အမျိုးသမီး လူငယ်တွေအတွက် စံပြကောင်းတယောက်ဖြစ်တယ်လို့ ကော်သူးလေ အလုပ်သမားသမဂ္ဂများအဖွဲ့ချုပ်(FTUK) စည်းရုံးရေးနဲ့ သတင်း ရေးရာ တာဝန်ခံ စောလေးစေးက အခုလို ပြောပါတယ်။
“သူမဟာ ကိုယ်ကျိုးစွန့်အနစ်နာခံပြီး အမျိုးသားအတွက် စွမ်းစွမ်းတမံ လုပ်ဆောင်ခဲ့သူပါ။ ဒုက္ခသည်ခခန်းမှာ ကြီးပြင်းလာခဲ့ပေမယ့် ပြည်တွင်းထဲပြန် ၀င်ပြီး အမျိုးသားရေးအတွက် အလုပ်လုပ်တယ်။ USAမှာ သူ့ မိသားစုတွေနဲ့အတူ သွားနေရမယ့်အစား ကိုယ့်အမျိုးသားကို ကူညီတဲ့လမ်းကို သူမရွေးချယ်ခဲ့တယ်။ ဆင်းရဲဒုက္ခ မျိုးစုံကြားက စိတ်အားထက်သန်စွာနဲ့ လူမှုအသိုင်းအ၀ိုင်းကို ကူညီတယ်။ သူမဟာ အမျိုးသမီး လူငယ် တွေအတွက် စံပြကောင်းတစ်ယောက်ပဲလို့ ကျနော်မြင်တယ်”
အမေရိကန်ဒေါ်လာ (၂၀၀,၀)နဲ့ညီတဲ့ ဒီဆုကို မေလ ၂၇ရက်နေ့က KNU ထိန်းချုပ်ရာနယ်မြေတနေရာက ကရင် အမျိုးသားများ စည်းလုံးညီညွတ်ရေး နှီးနှောဖလှယ်ပွဲမှာ ချီးမြှင့်သွားတာ ဖြစ်ပါတယ်။
ပထမအကြိမ် ပဒိုမန်းရှာလားဖန်း လူငယ်ခေါင်းဆောင်ဆုကို ၂၀၀၈ခုနှစ်က ညောင်လေးပင်ခရိုင်မှ ကရင်အမျိုးသမီး အစည်းအရုံး ကော်မတီဝင် နော်ဖောက ဘလာထူးက ဆွတ်ခူးရရှိခဲ့ပြီး ဒုတိယအကြိမ်ဆုကို ကရင်ပြည်နယ်၊ ဖာပွန်ခရိုင်မှ ကျန်းမာ ရေးဝန်ထမ်း စောညွန့်ဝင်းက ဆွတ်ခူးရရှိခဲ့ပါတယ်။
ဖန်းဖောင်ဒေးရှင်းကို ၂၀၀၈ခုနှစ်၊ ဖေဖော်ဝါရီလ (၁၄)ရက်နေ့တွင် လုပ်ကြံသတ်ဖြတ်ခံရသည့် ကရင်အမျိုးသား အစည်းအရုံး(ကေအဲန်ယူ) အထွေထွေအတွင်းရေးမှူးချုပ် ပဒိုမန်းရှာလားဖန်းရဲ့သားသမီးများက တည်ထောင်ခဲ့ခြင်းတာ ဖြစ်ပါတယ်။
Source: KIC and DVB
0 comments:
Post a Comment