အမျိုးသား ဒီမိုကရေစီအဖွဲ့ချုပ် (NLD) ရဲ့ လူမှုရေးလုပ်ငန်း ရံပုံငွေအတွက် “အလင်းနဲ့ရေးတဲ့ ပန်းချီ” ဓါတ်ပုံပြပွဲကို နောက်ဆုံးနေ့အဖြစ် ၂၆ ရက်နေ့ အထိ တစ်ရက် ထပ်တိုးလိုက်တဲ့ အကြောင်း ပြပွဲတာဝန်ခံ ဦးကြည်တိုးက ပြောပါတယ်။
“အရင်က ပြပွဲကို ၃ ရက်ကျင်းပဖို့ပါပဲ။ ဒါပေမယ့် ကျနော်တို့ဆီကို ပရိတ်သတ်တွေက ဖုန်းဆက်ပြီး Request လုပ်ကြတယ်။ ကျနော်တို့က ဒီပြပွဲစီစဉ်တာ ရက်နည်းနည်း နည်းသွားတယ်လေ။ ဖိတ်တာက ၃ ရက်လောက်ပဲ ကြိုဖိတ်လိုက်ရတယ်။ သိတာက နောက်ကျလို့ “လာပါရစေ ဦးခင်ဗျာ” ပြောလို့ ကျနော်တို့ တစ်ရက်တိုးလိုက်တာပါ။”
ရန်ကုန်မြို့ အမျိုးသား ဒီမိုကရေစီအဖွဲ့ချုပ် (NLD) ဌာနချုပ်မှာ လူငယ် အမျိုးသမီး ဓါတ်ပုံပညာရှင် ၅ ဦး အပါအ၀င် ဓါတ်ပုံအနုပညာရှင် စုစုပေါင်း ၃၈ ဦးတို့ရဲ့ ဓါတ်ပုံပြပွဲကို မေလ ၂၃ ရက်-၂၅ အထိ အရင်က သတ်မှတ်ထား ပေမယ့် ၂၆ ရက်နေ့ ညနေ (၄) နာရီ အထိ ဆက်လက် ကျင်းပမှာ ဖြစ်ပါတယ်။
စုစုပေါင်း ဓါတ်ပုံ ၉၈ ပုံ ပြသထားပြီး တစ်ပုံကို (၅၀,၀၀၀) ကျပ်နှုန်း ရောင်းချနေပါတယ်။ ဒီကနေ့ ညနေအထိ ဓါတ်ပုံအားလုံးပေါင်း (၂၄) ပုံ ရောင်းရပြီးဖြစ်ပါတယ်။
ဒီဓါတ်ပုံပြပွဲကို လာရောက်အားပေးတဲ့ သူတွေထဲမှာ နိုင်ငံခြားက ဧည့်သည်တွေ၊ ဓါတ်ပုံ ၀ါသနာပါသူတွေ၊ လူမှုအထောက်အကူလုပ်ငန်းတွေကို စေတနာနဲ့ ကူညီချင်တဲ့သူတွေ ပါဝင်တယ်လို့ သိရပါတယ်။
အခုလို လူတန်းစား အသီးသီးက လာရောက် ၀ယ်ယူကြတဲ့အတွက် အမျိုးသားဒီမိုကရေစီအဖွဲ့ချုပ်ရဲ့ လုပ်ငန်းတွေကို အားပေးထောက်ခံတဲ့ သဘောဆောင်တယ်လို့ ဦးကြည်တိုးက ဆက်ပြောပါတယ်။
“မြန်မာပြည်မှာ ဓါတ်ပုံတပုံကို (၅၀,၀၀၀) ကျပ် ပေးဝယ်နိုင်တဲ့ လူတန်းစား နည်းနည်းရှားတယ်။ အခု ကျနော်မြင်တာက ကျနော်တို့ဆီကို ဓါတ်ပုံ ၂၄ ကားအထိ လာအားပေးကြတယ်ဆိုတာကတော့ အဖွဲ့ချုပ်ကို အားပေးထောက်ခံမှု ပြသတယ် လို့ ထင်ပါတယ်”
ခင်းကျင်း ပြသထားတဲ့ ဓါတ်ပုံအမျိုးအစားတွေ အထဲမှာ ဘုန်းကြီး ဆွမ်းခံတဲ့ပုံ၊ ဆည်းဆာပုံ၊ ဘုရားပုံ၊ တိုင်းရင်းသားရိုးရာပုံ၊ လက်လုပ်လက်စား အလုပ်သမားပုံ စတဲ့ ပုံတွေ ပါတယ်။
ဓာတ်ပုံပြပွဲကို နာမည်ရ ဂီတအနုပညာရှင် တချို့နဲ့ အမေရိကန်နဲ့ ဗြိတိန်သံရုံးက တာဝန်ရှိသူတွေလည်း လာရောက် အားပေးသွားတယ်လို့ သိရပါတယ်။
တဆက်ထဲမှာပဲ “အလင်းနဲ့ရေးတဲ့ ပန်းချီ” ဆိုတဲ့ စာအုပ်ကိုလည်း တစ်အုပ်ကို ၃၅၀၀ ကျပ်နှုန်း နဲ့ အုပ် ၁၀၀ ကျော် ရောင်းချနိုင်ခဲ့တယ်လို့ သိရပါတယ်။
ယုန်ကလေး
0 comments:
Post a Comment