“အလင်းနဲ့ရေးတဲ့ ပန်းချီ” လို့ နာမည် ပေးထားတဲ့ ဓါတ်ပုံပြပွဲ တစ်ခုကို ရန်ကုန်မြို့ အမျိုးသား ဒီမိုကရေစီအဖွဲ့ချုပ် (NLD) ဌာနချုပ်မှာ ဒေါ်အောင်ဆန်းစုကြည် ကိုယ်တိုင် ဒီကနေ့ ဖဲကြိုးဖြတ် ဖွင့်လှစ် ပေးခဲ့ပါတယ်။ပြင်ပ အနုပညာရှင် လောကနဲ့ NLD တို့အကြား ကွန်ယက် Network တည်ဆောက်တဲ့ အနေနဲ့ ဆောင်ရွက်တာ ဖြစ်တယ်လို့ ပြပွဲတာဝန်ခံ တစ်ဦးဖြစ်တဲ့ ဦးကြည်တိုးက အခုလို ပြောပါတယ်။
“အဓိက ရည်ရွယ်ချက် ကတော့ အမျိုးသား ဒီမိုကရေစီအဖွဲ့ချုပ် ရဲ့ ပြန်ကြားရေးအဖွဲ့ နဲ့ ပြင်ပ လူငယ် ဓါတ်ပုံပညာရှင်တွေ ပူးပေါင်းဆောင်ရွက်မှုကို လုပ်ဆောင်ပေးတယ်။ ကျနော်တို့ ခေါင်းဆောင် အထွထွေအတွင်းရေးမှူး ပြောပြောနေတဲ့ Network ပေါ့။ ဒုတိယအချက်ကျမှ ရံပုံငွေအတွက် ဖြစ်ပါတယ်။”
လူငယ် အမျိုးသမီး ဓာတ်ပုံပညာရှင် ၅ ဦး အပါအ၀င် ဓာတ်ပုံအနုပညာရှင် စုစုပေါင်း ၃၈ ဦးတို့ရဲ့ ဓါတ်ပုံတွေကို မေလ ၂၃ ရက်နေ့ကနေ ၂၅ ရက်နေ့အထိ ပြသသွားမှာ ဖြစ်ပါတယ်။ ဓာတ်ပုံ ဆရာ-ဆရာမများရဲ့ အမည်တွေ ကိုတော့ “လုံခြုံရေး” အရ ပြောဆိုခြင်း မရှိပေမယ့် ဓာတ်ပုံပြပွဲတွေ ကျင်းပလေ့ရှိတဲ့ နာမည်ရထားသူတွေ ဖြစ်တယ်လို့ သိရပါတယ်။
ခင်းကျင်း ပြသထားတဲ့ ဓါတ်ပုံအမျိုးအစား တွေ အထဲမှာ ဘုန်းကြီး ဆွမ်းခံတဲ့ပုံ၊ ဆည်းဆာပုံ၊ ဘုရားပုံ၊ တိုင်းရင်းသားရှုခင်းပုံ၊ လက်လုပ်လက်စား အလုပ်သမားပုံ စတဲ့ ပုံတွေ ပါတယ်။
ဒီပြပွဲမှာ လူသားတွေရဲ့လိုအပ်ချက်တွေ၊ မြန်မာနိုင်ငံသူ၊ နိုင်ငံသားတွေရဲ့ ဆင်းရဲတဲ့ အခြေခံလိုအပ်ချက်တွေကို ပိုပြီး တွေ့လာရတယ်လို့ ကိုယ်တိုင် သွားရောက်ကြည့်ခဲ့တဲ့ ရန်ကုန်လူငယ်တဦးက ပြောပြပါတယ်။
“ဒီနေ့ ကျနော် Photo Gallery ကို လာတဲ့အခါ တဲအိမ်လေးထဲမှာ ကလေးလေးနှစ်ယောက်က ငုတ်တုတ် ထိုင်နေတယ်။ သူ့အဖေက လှမ်းကြည့်နေတဲ့ပုံကို ကျနော်တွေ့လိုက်တယ်။ အဲ့ဒါလေးကို ကြည့်တဲ့အခါမှာ ကျနော်တို့နိုင်ငံရဲ့ အခြေခံ လူတန်းစားတွေ အောက်ခြေလူတန်းစားတွေရဲ့ ဘ၀အခြေအနေကို ကျနော်သွား တွေ့ရတယ်”
ပြသထားတဲ့ ဓာတ်ပုံတွေကို အမျိုးသားဒီမိုကရေစီအဖွဲ့ချုပ် လူမှုရေးလုပ်ငန်းအတွက် ရန်ပုံငွေအနေနဲ့ တစ်ပုံကို (၅၀,၀၀၀) ကျပ်နှုန်း ရောင်းချမှာ ဖြစ်ပြီး စုစုပေါင်း ဓါတ်ပုံ ၉၈ ပုံ ပြသထားတယ်လို့ သိရပါတယ်။ ဒီကနေ့ ညနေအထိ ဓာတ်ပုံ ၁၁ ပုံ ရောင်းချပြီးကြောင်း ဦးကြည်တိုးက ပြောပါတယ်။
ဒီကနေ့ ဓာတ်ပုံပြပွဲကို လူဦးရေ စုစုပေါင်း ၁၀၀ ကျော် လာရောက် ကြည့်ရှုတဲ့ အထဲမှာ နာမည်ရ ဂီတအနုပညာရှင် တချို့နဲ့ နိုင်ငံခြားသားတွေလည်း ပါဝင်တယ်လို့ သိရပါတယ်။
အနုပညာရှင်ထဲမှာ အဆိုတော်တွေဖြစ်ကြတဲ့ ကြည်လတ်၊ ဇေယျာသော်တို့ ပါဝင်ပြီး ဂီတပညာရှင်တွေကတော့ ကိုရဲလွင်၊ ကိုတိုးလွင်၊ ကိုသားထွေး၊ ကိုညီညီလွင်တို့ နဲ့အတူ ကဗျာဆရာတွေဖြစ်ကြတဲ့ ကိုကြည်မောင်သန်း၊ ကိုငြိမ်းသစ်၊ ကိုရင်နီ နဲ့ ကိုမိုးဇော်တို့ ဖြစ်ပါတယ်။
တဆက်ထဲမှာပဲ “အလင်းနဲ့ရေးတဲ့ ပန်းချီ” ဆိုတဲ့ စာအုပ်ကိုလည်း တစ်အုပ်ကို ၃၅၀၀ ကျပ်နှုန်း နဲ့ အုပ် ၁၀၀ ရောင်းချနိုင်ခဲ့တယ်လို့ သိရပါတယ်ရှင်။
ယုန်ကလေး
0 comments:
Post a Comment