ဆက်လက် တိုက်ပွဲဝင်မည်ဟု ကေအန်ယူ ပြောကြား
ချင်းမိုင်။ ။ အာဇာနည် ခေါင်းဆောင်ကြီးများ၏ စံနမူနာကောင်းကို ယူကာ ရန်သူ (နအဖ) ကို အောင်ပွဲရသည်အထိ တိုက်ပွဲဝင်မည်ဟု ကရင်အမျိုးသား အစည်းအရုံး (ကေအန်ယူ) ခေါင်းဆောင်များက ယနေ့ ပြောကြားလိုက်သည်။
၅၈ ကြိမ်မြောက် ကရင့်အာဇာနည်နေ့ အခမ်းအနားကို ထိုင်း-မြန်မာနယ်စပ် ကော်သူးလေး နယ်မြေ၌ ယနေ့ နံနက်ပိုင်းကကျင်းပရာ ကေအန်ယူ ဥက္ကဋ္ဌ စောတာမလာဘော၊ (KNLA) ကရင်အမျိုးသား လွတ်မြောက်ရေး တပ်မတော် စစ်ဦးစီးချုပ် - ဗိုလ်ချုပ် မူတူးစေးဖိုး၊ ကေအန်ယူ တွဲဖက် အထွေထွေ အတွင်းရေးမှူး (၁) ပဒိုဒေးဗစ် သာကပေါတို့က ယခုလို တိုက်တွန်း ပြောကြားသွားခြင်း ဖြစ်သည်။
“ဆက်ပြီး တိုက်ပွဲတွေ ရှိနေတဲ့အပေါ်မှာ ကျနော်တို့ ခေါင်းဆောင်တွေ ချထားတဲ့ မူတွေနဲ့ လမ်းစဉ်တွေ အပေါ်မှာ ညီညီညာညာနဲ့ ရပ်တည်သွားကြဖို့၊ အာဇာနည်တွေရဲ့ စံနမူနာကောင်းတွေကို ယူပြီးတော့ပေါ့ဗျာ၊ ရန်သူကို အောင်ပွဲရတဲ့ အထိ တိုက်ပွဲဝင်သွားဖို့၊ အဲဒါတွေပါပဲ” ဟု ကေအန်ယူ (ဗဟို) သတင်းနှင့် ပြန်ကြားရေး တာဝန်ခံ ပဒို စောလှငွေက မဇ္ဈိမကို ပြောသည်။
သူက ဆက်ပြီး “သစ္စာဖောက် အညံ့ခံရေးတွေလည်း အများအပြားကြီး ပေါ်လာတယ်။ ဒါပေမဲ့ ဘယ်လိုပဲဖြစ်ဖြစ် ဒီဟာတွေ အကြောင်းကြောင်းကြောင့် ကျနော်တို့က ဘယ်လိုမှကျနော်တို့ တော်လှန်ရေးကြီးဟာ ဆုတ်သွားမှာ မဟုတ်ဘူး” ဟု ပြောသည်။
အခမ်းအနားသို့ ကေအန်ယူ ဘားအံခရိုင် ဥက္ကဋ္ဌ ပဒိုအားတိုး၊ တပ်မဟာ ၇ တပ်မဟာမှူး ဗိုလ်ချုပ် သူရဂျော်နီ၊ မြို့နယ် ခေါင်းဆောင်များနှင့် ပရိသတ် ၈ဝဝ ခန့် တက်ရောက်သလို၊ ကေအန်ယူ တပ်သား ၁၅ဝ ခန့်က စစ်ရေးပြ အခမ်းအနား ကျင်းပခဲ့သေးသည်။
ပြီးခဲ့သည့် တနှစ်အတွင်း ကျဆုံးသွားသည့် ကရင့်အာဇာနည် ရဲဘော်များ၊ ခေါင်းဆောင်များ၏ မိသားစုဝင်များ သားသမီးများနှင့် ဇနီးသည်များအား ဂုဏ်ပြုပွဲတခုလည်း ပြုလုပ်ခဲ့သည်ဟု ဘားအံခရိုင် တပ်မဟာ (၇) မှ စည်းရုံးရေး တာဝန်ခံ စောတာဒိုမူးက ပြောသည်။
သူက “ကိုယ့်လင်၊ ကိုယ့်သားတွေ အဲလို စွန့်လွှတ်အနစ်နာ ခံသွားတဲ့ဟာကို ကျနော်တို့ ဂုဏ်ယူတယ်ပေါ့။ အဲဒီအပေါ်မှာ မူတည်ပြီးတော့ ကျနော်တို့ သစ္စာပြုတယ်ပေါ့။ ကျနော်တို့ နိုင်ငံရေး ပြီးဆုံးတဲ့အထိ လုပ်သွားဖို့ အသက်တွေ၊ သွေးတွေ ပေးသွားတာ အလကား မဟုတ်ဘူးဆိုတဲ့ဟာကို သက်သေထူတာပေါ့။ ကျန်တဲ့ လူတွေကလည်း တစုထဲ တဝိုင်းထဲပဲ ကျနော်တို့ ညီညီညွတ်ညွတ်နဲ့ ဆက်သွားကြမယ်ပေါ့။ အဓိကတော့ ကျနော်တို့ အဲဒီလို ရည်ရွယ်တာပဲ” ဟု ပြောသည်။
မြန်မာနိုင်ငံရှိ တိုင်းရင်းသားလူမျိုးများ တန်းတူရေးနှင့် ကိုယ်ပိုင်ပြဋ္ဌာန်းခွင့် ရရှိရေးအတွက် ကေအန်ယူကို ဦးဆောင် တိုက်ပွဲဝင်ခဲ့သူ ကရင်အမျိုးသား ခေါင်းဆောင် စောဘဦးကြီးအား စစ်တပ်မှ ဖမ်းဆီးကာ ၁၉၅ဝ ခုနှစ် သြဂုတ်လ ၁၂ ရက်နေ့ နံနက်ပိုင်းတွင် ကရင်ပြည်နယ် ကော့ကရိတ်မြို့နယ်ရှိ ထော့ကိုကိုးရွာ၌ သတ်ဖြတ်ခဲ့သည်။ ကေအန်ယူက ထိုနေ့ကို ကရင့်အာဇာနည်နေ့အဖြစ် သတ်မှတ်ကာ ကျင်းပလာခဲ့ခြင်း ဖြစ်သည်။
0 comments:
Post a Comment